తల రాతలు

విలాసాగరం    |    తల రాతలు

1.
అది ఒక వ్యర్థ భూమి
ఏరుకోవడం రానివారికి
అది ఒక పవిత్ర క్షేత్రం
పిండుకోవడం నేర్చిన వాడికి

2.
అక్కడ కొన్ని లేత తీగలు
వరుసలతో కట్టేసీవుంటాయి
సరస్సు లోంచి తీసి
ఆరేసిన చేప పిల్లల్లా

ఒక పెద్ద తల అటూ ఇటూ తిరుగుతూ
కాపలాకాస్తూ వుంటుంది
సరిహద్దు సైనికుడిలా

మధ్య మధ్యలో అపరిచిత సీతాకోక చిలుకలు
భయం కలిగిస్తూ తడుముతూ  వెలుతుంటాయి
దొంగలను వెతికే రక్షక భటుల్లా

3.
సంవత్సరం మొత్తం పోగేసిన బంగారాన్ని
అందమైన ఆకృతి లోకి
మూడు గంటల్లో పోత పోయాలి
స్వర్ణ కారుడిలా
ఇష్టం వున్నా లేకపోయినా

శరీరంలోని కణకణాన్ని కోసి
ఆ రూపానికి ప్రాణం పొయ్యాలి
ఆధునిక బ్రహ్మలా
జీవి కొట్లాడుతున్నా

మనసు గదిలోని మాటల మణులను చేర్చి
ఆ అవతారానికి సౌష్ఠవాన్ని చేకూర్చాలి
బ్యూటీషన్ లా
అంచనా అయ్యగారిని ఆకర్షించడం కోసమైనా...

4.
ఎంతటి ప్రాణమున్న పసిడి బొమ్మయినా
రత్నాల  జిలుగులు నిండినా
దాని అసలు విలువ తెలిసేది
సరియైన ఆటగాడిని చేరితేనే

ఎంత అందం పోతబోసుకున్నా
రసికుడిని చేరినప్పడే కదా
దాని జీవితం సార్థకం అయ్యేది ?

5.
అక్కడ కొన్ని చెవులు
కొరుక్కుంటున్నాయి
కాబోయే ఈ దేశ పౌరుల
తల రాతలు ఇక్కడే రాసుకుంటున్నారని...

కొన్ని గుండెలు బాదుకుంటున్నాయి
కొందరు గుంజుకొని రాస్తున్నారని....!

తేది : 03.04.2015.