కరెన్సీ మనుషులే

విలాసాగరం |   కరెన్సీ మనుషులే...

తలుపులు మూసాక అంతా చీకటేగా
వెలుగు రేఖలు లేవని మధనపడితే లాభమేమిటి ?

మాటల మంటలు మనసు మందిరాన్ని కాల్చాక
మిగిలేది ఒంటరితనమే కదా ?
తోడెవరూ లేరని వెక్కి వెక్కి ఏడిస్తే ఫలమేమి ?

చినుకు చినుకు జడివానై
నిండిన చెరువు కట్ట, తెగి
నీళ్ళన్నీ వాగు పాలయ్యాక
కన్నీళ్ళను నింపుకుంటే ఉపయోగముంటుందా ?

ఓటు మహారాణులను గంప గుత్తాగా
గంగిరెద్దులకు కట్టబెట్టి
అన్యాయంగా
ఇప్పుడు మా ఉసురు తీస్తున్నరని
బాధపడితే ప్రయోజనమేమిటి ?

యేరు దాటాక తెప్ప తగలెయ్యడం
మన వారికి వెన్నతో పెట్టిన విద్యనే కదా
తిన్న ఇంటి వాసాలు లెక్కబెట్టుడు
పుట్టుకతో వచ్చిన బుద్ధే కదా !

ఓట్లను నోట్ల కట్టలతో కొంటరు
తర్వాత
మనుషుల్ని కరెన్సీ నోట్లు గా లెక్కిస్తరు !!

తేది : 22.06.2015.